۱۲اینسان حاقلاری تشکیلاتی عباس لیسانی‌نین سربست بوراخیلماسینی طلب ائتدی
چهارشنبه
اون ایکی اینسان حاقلاری تشکیلاتی تورک (آذربایجانلی) فعال عباس لیسانی‌نین اردبیل حبس‌خاناسیندان قئید‌سیز شرطسیز سربست بوراخیلماسی اوچون بیلدیری یایینلادیلار.
بیلدیریده ایسلام جمهورییتی حاکیميتینی ائتنیک قروپلارین حوقوقلاری ایله باغلی بین الخلق عهده‌‌لیکلرینه عمل ائتمه‌یه چاغیردیلار.
تشکیلاتلار آیریجا، ایسلام جمهورییتی مقاملارینی «عباس لیسانی‌نین عائله‌‌‌سینه قارشی تضییقلری» دوردورمایا و «فیکیر و ایفاده آزادلیغینا اؤنم وئرمه‌لرینه» چاغیریش ائتدیلر.
بو تشکیلاتلار یازیرلار کی، لیسانی «ایللرله باریشجیل فعالیت نتیجه‌سینده حبس جزاسینا معروض قالمیش، اوزون مدت تجریده بوراخیلمیش، پسیکولوژیک و فیزیکی زوراکیلیق و سورگون ایله اوزلشیبدیر.»
مطالب مرتبط
بو بیلدیری‌نین باشقا بیر بؤلومونده «بیز، بو بیلدیرینی ایمضالایانلار، ایرانداکی آذربایجان تورکلری خالقی‌نین فیکیرلرینی و اینانجلارینی باریشجیل شکیلده ایفاده ائتمک حوقوقونون طرفداریییق” دئییلدی.
بیلدیرینی، عبدالرحمان برومند قورومو، ایران اینسان حوقوقلاری مودافیه‌چیسی قروپو، اهراز (ایرانداکی آذربایجانلیلارین اینسان حوقوقلاری بیرلیگی)، ایراندا هامی اوچون اینسان حوقوقلاری و ایرانداکی آذربایجانلیلارین حوقوقلاری‌نین مودافیه بیرلیگی ایمضالاییبلار.
۲۰۱۹-جو ایلین باشلاریندا عباس لیسانی، اردبیل اینقیلاب محکمه‌‌سی طرفیندن تهلوکه‌‌‌سیزلیک اتهامی ایله ۸ ایل حبس و ۲ ایل سورگونه محکوم ائدیلدی آنجاق اردبیل تمییز محکمه‌‌سی طرفیندن بو حؤکم آرتیریلدی و ۱۵ ایل حبس و ۲ ایل سورگون جزاسینا ديیشدیریلدی.
عباس لیسانی‌نین موراجعتی عالی محکمه طرفیندن رد ائدیلدی و ۱۴ تیر ۱۳۹۹-جی ایلده جناب لیسانی‌نین وکیلینه بیلدیریلدی.
عباس لیسانی ۲۵ دی ۱۳۹۷-جی ایلده تبریز اینقیلاب محکمه‌‌سی‌نین ۲-جی شؤبه‌سینده اونا قارشی باشقا بیر آچیق پرونده ایله علاقه‌دار محکمه‌‌یه چیخدی.
او عدالتسیز محکمه پروسسینه اعتراض ائده‌رک یئنیدن موراجعت ائتدی. محکمه‌‌دن چیخارکن تهلوکه‌‌‌سیزلیک قوه‌لری طرفیندن توتوقلاندی و اردبیل حبس‌خاناسینا کؤچورولدو و او واختدان بو یانا اردبیل حبس‌خاناسیندادیر.