اورمیه‌ده بیر اؤیرنجی محبوسون باجیسی تهدید ائدیله‌رک اطلاعاتا چاغیریلدی
شهید بهشتی بیلیم‌یوردونون حبسده اولان اؤیرنجی‌سی حامد قره‌اوغلانی‌نین باجیسی هانیه قره‌اوغلانی تلفونلا اورمیه اطلاعات ایداره‌سینه چاغیریلدیغینی بیلدیردی و گوونلیک گوجلری‌نین آناسینا “سایغی‌سیزلیق” ائتدیگینی سؤیله‌دی.
خانیم قره‌اوغلانی اؤز توییتر صفحه‌سینده یازدی: اورمیه حبس‌خاناسیندا قارداشیم حامد قره‌اوغلانی ایله سون گؤروشده مامورلار آنامی تحقیر و اونا سایغی‌سیزلیق ائتدیلر.
او سون بیر هفته عرضینده دفعه‌‌لرله تهدید اولوندوغونو و دونن اورمیه اطلاعات ایداره‌سینه چاغریلدیغینی سؤیله‌دی: “موحاکیمه اورقانلاریندا گوناهسیز بیر محبوسون یالواریشینی ائشیدن وارمی؟”
خانیم قره‌اوغلانی و آناسی‌نین صاباح اورمیه اطلاعات ایداره‌سینه گئتمه‌مه‌لری تقدیرده حبس ائدیله‌جکلری ایله تهدید ائدیلدیکلرینی یازدی.
حامد قره‌اوغلانی ، اورمیه اطلاعات ایداره‌سی مامورلاری طرفیندن سیاسی اتهاملارلا حبس ائدیلمیش و ۷ تیر ۱۳۹۹ شنبه گونوندن بری حبسده‌دیر.
حبسده اولان بو اؤیرنجی، اورمیه اینقیلاب محکمه‌‌سی‌نین اوچ حاکمی طرفیندن سیاسی و گوونلیک اتهاملاری ایله ۱۳ ایلدن چوخ حبس و اعدام جزاسینا محکوم ائدیلدی.
حامد قره‌اوغلانی “رئژیمه قارشی تبلیغات”، “رهبری تحقیر ائتمک” و “موخالیف قروپلارلا ایشبیرلیگی” ایله اتهام اولونور. منبع ایران وایر